موضوع: لنقترب من مشاعر الملتزمين.. الأحد يوليو 08, 2007 10:12 pm
السلام عليكم ورحمة الله وبركاته
الآن
لنقتـــــرب الى مشاعر الملتزمين
ونعيد فتح الموضوع
وننتظر مشاركاتكم ان شاء الله تعالى
بسم الله توكلنا على الله
أختكم في الله السلام عليكم ورحمة الله وبركاته
تخيلوا معايا صورة لشاب أول ما دخل الجامعة عمال يبحلق ويبص على البنات بيدور على فتاة أحلامه دي لاه مش دي طب دي لا مش دي ...... ياترى ده انسان ملتزم ؟ يا ترى ربنا راضي عنه ياترى ده بيغض بصره زي ما ديننا أمرنا ؟ الشاب ده حاجة من اتنين يا هتعجبه بنت ملتزمة يا هتعجبه بنت مش ملتزمة
محدش يستغرب ويقول معقووول الشاب ده تعجبه بنت ملتزمة ,, أيوة للأسف وبتحصل ليه للأسف لأن اللي هيحصل بعد كده يخلينا نأسف
بص شاف بنت لأنه بيدور على سطحيات عجبه شكلها وعمال يبص ومبينزلش عينه من عليها لا حول ولا قوة الا بالله
البنت احساسها ما بين خجل وما بين غضب
كل ما تروح مكان تلاقيه في وشها ومش بعيد يقول كلمة كده او كده
لو الشاب ده جرئ جدا هيروح على طول يكلمها وينتهز أي فرصة يكلمها يا هيسأل عن ميعاد سكشن او الدكتور الفلاني امتى هيجي ولا لو سمحتي ممكن محاضرة يوم التلات
طبعا البنت
ملتــــــــــــزمة
هتصده ومش هتعبره عارفة ان ده ميرضيش ربنا عارفة ان فيه ثقة أهلها ادوها ليها ولازم تكون قدها عارفة ان ربنا مطلع عليها وشايفها بالاضافة لان الشاب ده بعيد تماما عن فارس أحلامها الملتزم الخجول المتقي لله
ياترى الشاب هيستسلم ؟
كرامته اللي انجرحت وصحابه اللي ضحكوا عليه
يروح الشاب ده يدعي الالتزام وقت الاذان جرررري على مسجد الكلية ياترى عشان يلبي نداء ربنا؟ لاه عشان البنت تشوفه وهوه رايح يصلي شوية ولزوم الموضوع يطلق لحيته
في الحالة دي للأسف ممكن البنت تنخدع طبعا عشان هيه ملتزمة مش هترضى لا تكلمه ولا تخرج معاه بس هيشغل بالها وتفكيرها ومش بعيد تفكر فيه كزوج للمستقبل .........................
نقول للشاب ده يا ترى ممكن ده يحصل مع أختك؟ طيب مع بنتك ؟ متنساش كما تدين تدان متنساش انك كل هدفك الانتقام من بنت بتتقي الله ومش عايزة تقع في شئ غلط وصدتك خوفا من الله ياترى هيكون انتقام ربنا منك ازاي؟ ياترى ربنا هيباركلك؟
انماممكن يكون ربنا كاتب الهداية للشاب ده ويبدأ يحس بحلاوة الصلاة في المسجد وتتغير نيته بدل ما هو رايح عشان البنت تشوفه رايح عشان يرضي ربنا سبحانه وتعالى
وفي الحالة دي البنت هتكون داعية الي الله عز وجل بالتزامها وانها كانت سبب في هداية شخص
ومش بعيد يكون الشاب ده من نصيبها معقول؟
طب ازاي؟
وهيحصل ايه ؟
ده اللي هنقوله ان شاء الله تعالى مع
الشاب الملتزم والفتاة الملتزمة
طيب الكارثة لو الشاب ده عجبته بنت مش ملتزمة
ميكب وجينزات وطول الليل زيها زيه بتتفرج على قناة DDT 2 بتاعة الأفلام
والام بي ثري بلاير بتاعها مليان خبط ورزع
ولا رنت موبيلها .... حدث ولا حرج
يروح الشاب ده في يوم بعد المحاضرة ممكن أسألك الدكتور قال ايه في الأول أصلي جيت متأخر تاني يوم ممكن قلم ؟
شوية وبعد المحاضرة متشكر اوي بجد بس الجزء ده مفهمتوش ياترى فهميته؟
طيب ايه رأيك تيجي نقعد في الكافتيريا عشان تشرحيلي
ومن هنـــــــــــــــــــــــــــا تبدأ الكوارث
خروجات هدايا فسح رحلات وهابي فلانتين واليوم المئوي للأوبرا وأيام مسمينها أعياد واحنا المسلمين معندناش غير عيدين الأضحى والفطر
حاجات بجد تشيب بعد تام عن الله عز وجل
ولو جه رمضان البنت تقوله معلش سامحني بلاش كلام طول النهار مينفعش في رمضان كده انما بليل مش بعيدة تروح خيمة رمضانية لأحياء الليل على أصوات معازف الشيطان
والنهاية ورقة يحاولوا يضحكوا بيها على بعض ان الحرام حلال
نسيوا ان لا زواج بدون ولي؟ نسيوا ان فيه شرط من شروط صحة الزواج هو الاشهار
من الآخر نسيوا الله عز وجل
الشاب ده بعد فترة هيهرب من البنت هيغير رقم موبيله هيغيب اسبوع عن المحاضرات ولا شهر ومش بعيد يسافر شرم الشيخ يغير جو اووووووووف البت دي زهقت منها وجالي اكتئاب
انما البنت حدث ولا حرج
يا اما بتبكي يا أما زي المجنونة من الصبح لبليل واقفاله على باب الجامعة وبتتصل بصاحبه الفلاني وتتحايل على صاحبه التاني وتبوس ايده تسأله فييييين "مش بعيد الشاب ده يكون اسمه محمد" وانت يا مصطفى"صاحبه" مش كنت شاهد ومضيت على الورقة ؟ يرد باستغراب شاهد على ايه آآآه انا مشاهد لفيلم السم المدسوس على قناة DDT2 ويضحك ويمشي ويسيبها
البنت احساسها حسرة وندم وضياع حياتها انتهت ومش بعيد يكون فيه طفل في بطنها هتواجه بيه المجتمع ازاي؟ هتواجه بيه ربنا ازاي؟ هتقتله؟؟؟؟ ولا هتعمل فيه ايه؟؟؟
الموضوع ده موجود وللأسف منتشر والدليل 10 آلاف قضية نسب في مصر تنظر أمام المحاكم !!!!!!!!!!!!!!!!!!!
الشاب ده نسي في لحظة ان ربنا سبحانه وتعالى مطلع عليه نسي انه كما تدين تدان واللي عمله في بنات الناس هيقعدله وممكن يحصل مع اخته مع بنته مع حفيدته الشاب ده نسي ان عمره لحظة وان أجله ممكن يجيي في اي لحظة والحوادث كتير ياترى هيقابل ربه ازاي؟
البنت بردو نسيت ربها وأهلها وملهاش حجة ده ضحك عليه ده وعدني ان الورقة دي لحد ما نتخرج عقلك فين؟ ثقة أهلك ضيعتيها فين؟ دلوقتي البنت دي عمال يتقدملها شباب ولا كانت بتحلم بيهم شباب كان ممكن تعيش حياتها في منتهى السعادة معاهم وطبعا بترفض واهلها محسورين عليها
ضيعت سعادتها ومستقبلها في لحظة زائفة وحب "كره" زائف
عشان نكون صرحاء فيه قلة من الشباب والبنات غير الملتزمين الأمور مبتتطورش معاهم للدرجة دي وليه قلة
عشان سولنا الحبيب قال
من كان يؤمن بالله و اليوم الآخر فلا يخلون بامرأة ليس معها ذو محرم منهاثالثهماالشيطان .
صحيح
الألباني إرواء الغليل
181
بس بردو فيه منهم بيتحرى عدم الخلوة يعني الموضوع
خروجات وفسح وتليفونات وضحك وهمسات ولمسات
ياترى طلعوا من العلاقة دي بايه؟ بذنوب اد ايه ؟ وياترى القلب لسه صافي ؟ ياترى مشاعرك اللي استهلكت دي مش أولى بيها زوجتك؟ وانتي يا اختي مشاعرك دي مش أولى بيها زوجك وأولادك؟
هتقدروا على العطاء بعد كده؟ قلبك اللي استهلك واتجرح هيقدر يدي بعد كده؟
تيجوا نشوف الذنوب جت من ايه ؟
أولا السلامات ومسك الايد عشان يعدوا الشارع ومش بعيد في سينما من السينيمات
يقول رسول الله صلى الله عليه وسلم لأن يطعن في رأس أحدكمبمخيط من حديدخير له من أن يمس امرأة لا تحلله ... صحيح الألباني .. صحيح الجامع 5045 طيب واللي هيقول انا مش بمسك ايديها ولا هيه كمان بتسلم رغم ان ده طبعا تقريبا مستحيل ياترى بردو معملتوش الذنب اللي جاي ده ده؟ يقول الله تعالى في سورة النور آية رقم 30 قُل لِّلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ذَلِكَ أَزْكَى لَهُمْ إِنَّ اللَّهَ خَبِيرٌ بِمَا يَصْنَعُونَ وفي الآية التالية لها يقول الله تعالى وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ وَلَا يُبْدِينَ زِينَتَهُنَّ إِلَّا مَا ظَهَرَ مِنْهَا وَلْيَضْرِبْنَ بِخُمُرِهِنَّ عَلَى جُيُوبِهِنَّ وَلَا يُبْدِينَ زِينَتَهُنَّ إِلَّا لِبُعُولَتِهِنَّ أَوْ آبَائِهِنَّ أَوْ آبَاء بُعُولَتِهِنَّ أَوْ أَبْنَائِهِنَّ أَوْ أَبْنَاء بُعُولَتِهِنَّ أَوْ إِخْوَانِهِنَّ أَوْ بَنِي إِخْوَانِهِنَّ أَوْ بَنِي أَخَوَاتِهِنَّ أَوْ نِسَائِهِنَّ أَوْ مَا مَلَكَتْ أَيْمَانُهُنَّ أَوِ التَّابِعِينَ غَيْرِ أُوْلِي الْإِرْبَةِ مِنَ الرِّجَالِ أَوِ الطِّفْلِ الَّذِينَ لَمْ يَظْهَرُوا عَلَى عَوْرَاتِ النِّسَاء وَلَا يَضْرِبْنَ بِأَرْجُلِهِنَّ لِيُعْلَمَ مَا يُخْفِينَ مِن زِينَتِهِنَّ وَتُوبُوا إِلَى اللَّهِ جَمِيعًا أَيُّهَا الْمُؤْمِنُونَ لَعَلَّكُمْ تُفْلِحُونَ ولا ممكن كمان مافيش نظرات؟؟ !!!!!!!!!!!!!!!! سبحانك اللهم وبحمدك أشهد أن لا اله الا أنت أستغفرك وأتوب اليك
رسالة لأخي وأختي الملتزمة
لو شفتي ولد وبنت واقفين بيتكلموا وبيهزورا وبيضحكوا وكلام وهمسات وحاجات
ممكن يجيلك احساسين
أول احساس تتريق بينك وبين نفسك عليهم لأنك واثق ان كده غلط
بالله عليك متشمتش فلا تشمت بأخيك فيعافيه الله ويبتليك
احمد الله على نعمة الهداية وادعيه يا مثبت القلوب والأبصار ثبت قلبي على دينك ومافيش مانع تدعي وتقول الحمد لله الذي عافاني مما ابتلى بعه غيري وفضلني على كثير ممن خلق تفضيلا ... تذكر انهم مرضى بقلوبهم فاحمد الله على صلاح قلبك
فلا تنسى الأنس بالله وتذكر " ان آنس الحبيب بحبيبه فآنس أنت بالله " اصبر .. اتق الله فانه من يتق ويصبر فان الله لا يضيع أجر المحسنين ادعو الله عز وجل أن ييسر لك أمرك ويكفيك بحلاله عن حرامه ويغنيك بفضله عمن سواه ردد يارب ارزقني رفيق الدرب الصالح الذي يعفني ويقربني منك ويأخذ بيدي اليك
ياترى التنفيذ صعب؟
لو بصيت على الكورنيش
ولا عديت على جامعة من الجامعات
شباب وبنات زي الفل لكن يا خسارة الاعلام سمم عقولهم بأفكار
من قناة ال DDT 2 للأفلام لقناة كابوس2 اللي مبتبطلش رزع وطبل
خلاص تاهوا وعقولهم اتبرمجت على حاجات لا هي من ديننا ولا هي حتى من عاداتنا الشرقية
لكن محاولة لانقاذ ما يمكن انقاذه ياترى ممكن نبعت الرسالة دي للجروبات والايميلات احتمال تصحي حد احتمال نلحق بنت او نلحق شاب وانخد بايدهم
السلام عليكم ورحمة الله وبركاته
اخوانا واخواتنا بتوع حب الشات والمسجات والخروجات
عاوزين نتفق على كام نقطة أولا
ياترى كل واحد سأل نفسه انا ايه هدفي الزواج
ياترى لو شاب هدفه يتزوج بنت حلوة ؟
لو بنت هدفها تتزوج ولد وسيم وغني وطول بعرض؟
طب ليه ميكونش هدفك زواج سعيد وزوجة جميلة بتحبها ونهاية سعيدة بالجنة يعني زوجة تاخد بايدك للجنة ؟
وانتي يا أختي ليه ميكونش هدفك زواج سعيد وايه المانع انه يكون وسيم وطول بعرض بس بشرط ان نهاية الزواج سعيدة لأنك تزوجتي زوج هيسعدك في الدنيا وهياخد بايدك للجنة؟
ليه نبص للدنيا وبس؟
ليه ميكونش دعائنا
"ربنا آتنا في الدنيا حسنة وفي الآخرة حسنة وقنا عذاب النار"
ليه نكون من الناس اللي بتقول ربنا آتنا في الدنيا وماله في الآخرة من خلاق؟
يعني دنيا وبس ... خروجات فرفشة نعنشة طب وبعدين وآخرة كل ده ايه
ستـــــــــــــــــــــوب
راجع نفسك ... راجعي نفسك
ياترى فهمتوا رسالتي ؟
دي رسالة أتمنى توصل لكل شاب وفتاة بعيد شوية عن الالتزام احتمال تصحي جواهم حاجة احتمال يعرفوا ان السعادة اللحظية مش دايمة وان السعادة الحقيقية في ارضاء الله عز وجل
السلام عليكم ورحمة الله وبركاته
دلوقتي الدور على
شاب ملتزم وبنت مش ملتزمة
ممكن ؟ أيوة ممكن..........
كتير من الشباب الملتزم او بعض منهم بلاش كتير بيكون في باله انه لو تزوج بنت مش ملتزمة هياخد بايديها وكده يكون كسب هدايتها وكل اعمالها تكون بميزانه
ياترى ده بيحصل ؟
قصة من أرض الواقــــع
صيدلي شاب ملتزم وأحسبه على خير ولا أزكي على الله أحد ليه صديق ليه أخت صيدلانية بردو رغم انها طيبة وفعلا ماشاء الله بنت حلال بس ميكب وكده المهم البنت دي كانت معجبة بالشاب ده جدا وكل صحباتها كانوا عارفين
الشاب ده اتقدم للبنت دي وكان في باله انها قابلة للتغيير وتمت الخطوبة اللبس ده لأه الميكب لأه مافيش تأخير برة البيت
كانت تتعمد انها تلبس جيبات معينة وتتأخر برة البيت وتعدي من قدام صيدليته متأخر عشان يعرف
حاول يعرفها على زوجات أصدقاؤه الملتزمين بس هيه طبعا نو واي
وللأسف باظت الجوازة
أسأل الله عز وجل أن ينير بصيرتها ويهديها الى نوره
سؤالي للشاب ده ياترى قبل ما تتمم الخطوبة سألتها انتي عندك استعداد تلتزمي ولا لاه؟
سؤال تاني للشاب ده هل طبقت الحديث ده ؟
يعني الصيدلي ده أخطأ في اختياره أصلا بس الحمد لله انه متممش الجوازة والا كان الموضوع بدل ما فسخ خطوبة كان طلاق
بردو قصة أخرى من واقع الحياة
وأكيد عارفينها
ممثل شاب ولن أذكر اسمه وياريت محدش يقوله نسأل الله لنا وله الهداية
مفترض انه ملتزم لكنه ظل في وسط فاسد ومثل الجليس الصالح وجليس السوء كحامل المسك ونافخ الكير
الله أعلم هوه اللي أعجب بالبنت ولا البنت اللي اعجبت بيه
المهم انه في النهاية وقع في المعصية
وزي ما اتفقنا ان من شروط الزواج الاشهار وولي
نصيحة لكل شاب ملتزم كن داعيا الى الله بمواصفاتك في اختيار زوجتك
لو الصيدلي ده كان صرح وقال انا مواصفاتي في زوجتي كذا وكذا وكذا على الأقل لأخو البنت كانت فكرت 100 مرة وكان ممكن بالفعل ان تسلك طريق الهداية على الأقل لتظفر به زوجا لها وان بدأ الموضوع معها تظاهر سينتهي بالقرب من الله
فمن ذاق حلاوة الصلاة لا يقوى على ان يحرم منها
وان كان انك لا تهدي من احببت ولكن الله يهدي من يشاء
وبردو نستفيد من قصة الممثل ده ان القلوب بين يدي الله عز وجل يقلبها كيفما يشاء
اللهم يا مثبت القلوب والابصار ثبت قلوبنا على دينك ربنا لا تزغ قلوبنا بعد اذ هديتنا ولا تجعل مصيبتنا في ديننا
لو كريم مخلص جامعة وجيش وعنده شقة وشغل مش هيتردد يخطب داليا
لكن الحكاية انه لسه في الجامعة
الاتنين في تالته هندسة قد بعض تمام
قبل سنة 3 كريم مكنش يعرف داليا لأنه بيغض بصره لكن تأتي الرياح بما لا تشتهي السفن
البشمهندس في المعمل قسمهم مجموعات كل مجموعة 5 مجموعة كريم كانوا 3 شباب وبنتين
طبعا كان مضطر يتكلم
وحصل زي ما قولنا هنا وفيه شاب تاني ربنا قدر له ان في بروجكت مثلا يكون في جروب وللأسف زي ما احنا عارفين الجامعات المختلطة كان معاه في الجروب بنات وكان طبعا فيه تعامل للضرورة لا كلام ولا ضحك ولا كافتيريات مع بعض ولا خروجات ولا هابي فلانتين ........ كلام في السكشن او في المعمل او بين المحاضرات وسط الجروب كله مش همسات ولا بصات بدأ يحس ان فيه بنت هوه مرتاح لها لأ ده بيحبها لأ ده التزامها دي طريقتها ده اسلوبها دي بتتقي الله دي بتغض بصرها دي لبسها محتشم لقى فيها فتاة أحلامه كل ما يكلمها يغض بصره وبيحاول يتجنب يوجه ليها كلام
بدأ يقاوم الاحساس ده بس الاحساس زاد جواه
وفي نفس الوقت نفس البنت عندها نفس الاحساس وبتقاوم بنفس الطريقة ............
كريم فعلا ولد متدين وبيعرف ربنا في البداية فضل يقاوم احساسه ازاي انا اعجب ببنت وفعلا بيغض بصره وهوه بيكلمها لكن الأرواح جنود مجندة ما تعارف منها ائتلف
داليا بتلوم نفسها ازاي ممكن يكون عندها الاحساس ده
والاتنين مكنش قدامهم ملجأ غير الله عز وجل
كريم في قيام الليل بيدعي يارب يسر لي الخير يارب لو كنت في زمن رسول الله كنت اتقدمت وكملت نص ديني
لكن انا لو عتبت باب بيتهم أهلها ...
في الوقت ده داليا كان بيتقدملها ناس عشان تخطبها وأهلها كانوا بيضغطوا عليها
لا داليا تعرف ان كريم بيتمناها زوجة ليه ولا كريم يعرف ان داليا بتتمناه زوج ليه
ياترى ايه اللي هيحصل؟؟؟
على فكرة دي قصة حقيقية لكن بتصرف واختلاف للأسماء فقط
السلام عليكم ورحمة الله وبركاته
وقبل ما أكمل حدوتة كريم وداليا
وزي ما قولت ان شاء الله فيه قصص واقعية كتير للملتزمين
عايزة أسأل سؤال لكل شاب ملتزم
ياترى بعد ما استخرت الله عايز ايه ومستني ايه من البنت اللي انت جواك مشاعر تجاهها !!!!!!!!
وبردو سؤال لأختي الملتزمة
يا ترى عايزة ايه ومستنية ايه من الشاب اللي جواكِ مشاعر تجاهه !!!!!!!!
ممكن حد يستغرب اني بقول بعد الاستخارة
ما هو يا جماعة الموضوع مش لعب عيال وادينا هنجرب والأيام كفيلة
لاه الموضوع ان أول طوبة بتتحط
أول طوبة لبناء بيت سعيد مبني على تقوى الله م ن ق و ل
امير الشرقية Admin
عدد الرسائل : 148 تاريخ التسجيل : 24/05/2007
موضوع: رد: لنقترب من مشاعر الملتزمين.. الثلاثاء يوليو 10, 2007 8:23 pm
موضوعك بجد جميل قوى ربنا يقدرنى وانشره
flawer_girl100
عدد الرسائل : 205 تاريخ التسجيل : 30/05/2007
موضوع: رد: لنقترب من مشاعر الملتزمين.. الأربعاء يوليو 11, 2007 6:04 pm
الأحد يوليو 08, 2007 10:12 pm
